Xeodestino A Limia

Natureza na terra, na auga e no aire

O territorio

O territorio do Xeodestino A Limia, no sur da provincia de Ourense, está formado polos concellos de Baltar, Os Blancos, Calvos de Randín, A Porqueira, Rairiz de Veiga, Sandiás, Sarreaus, Trasmiras e Xinzo de Limia. Unha parte significativa do territorio (12%) forma parte da Rede Natura 2000 e conta coas seguintes figuras de protección ambiental: ZEPN (Zona de Especial Protección dos Valores Naturais) de Ponteliñares e Baixa Limia, ZEPA (Zona de Especial Protección para as Aves) da Limia e a Baixa Limia, Reserva de Biosfera Área de Allariz, Reserva da Biosfera Transfronteiriza Gerês-Xurés e Parque Natural Baixa Limia Serra do Xurés.

O pasado está marcado pola Lagoa de Antela, protagonista do grande complexo húmido da Limia. A lagoa foi desecada nos anos sesenta. Hoxe, entidades como a Sociedade Galega de Historia Natural, traballan para estudar e transmitir os valores naturais e tradicionais da comarca. O obxectivo é compatibilizar a recuperación de humidais con outras actividades como a agricultura e a gandaría sostibles.

Patrimonio
ornitolóxico

O Xeodestino A Limia conta con tres áreas de especial interese para as persoas afeccionadas á observación e ao estudo das aves. As Areeiras da Limia, na confluencia dos concellos de Sandiás, Vilar de Santos e Xinzo de Limia, conta con algunhas lagoas comunicadas por camiños que se poden percorrer en coche, a pé ou en bicicleta. A Casa da Lagoa, no Concello de Sandiás, é un centro de interpretación no que se pode consultar información sobre a historia da zona, espazos para visitar, especies, etc.

A segunda das áreas é a Veiga de Ponteliñares. Ocupa unha parte dos concellos de Rairiz de Veiga e A Porqueira e forma parte da Reserva da Biosfera Área de Allariz. No Concello de Baltar, no sur da comarca da Limia, está a área da Serra do Larouco. É unha gran formación granítica que supera os mil metros de altitude en varios puntos e chega aos 1.535 metros no lado portugués, o terceiro cumio máis alto do país.